14/5/22

FACEMOS O CAMIÑO DE SANTIAGO VIRTUALMENTE!!!

Dende Infantil, queremos propoñervos unha actividade en familia ao aire libre e relacionada co proxecto anual do noso Cole "Barro no Camiño".

A nosa proposta é que fagades un ou varios tramos do Camiño de Santiago que pasa polo noso Concello, facer unha foto xunto a un dos fitos que hai ao longo do camiño e subila a este padlet:

PADLET BARRO NO CAMIÑO

Tamén podedes acceder ao padlet a través deste código Qr:


Mimi xa está facendo o Camiño!!! 

Como boas e bos pelegríns iremos selando a "nosa credencial", cun selo moi especial. Cantas máis fotos en diferentes fitos, máis selos acumularedes!!! No pé da foto deberedes poñer onde vos atopades.

Deixámosvos un pequeno titorial de como subir a foto (clicade enriba para ampliar):


Animádevos a desfrutar do noso patrimonio cultural e natural, gozade do voso tempo en familia e descubride as particularidades do Camiño de Santiago no noso Concello.


23/3/22

CON MOITA ARTE!

As crianzas de Infantil participaron moi emocionadas no xogo de pistas "Do 8 ao 18" que desenvolvemos no colexio no marco da conmemoración do Día da Muller. Día tras día, indagaron sobre cada unha das mulleres artistas homenaxeadas e, incluso, crearon e recrearon as súas imaxes como ben fixeron, por exemplo, as nenas e nenos de 6º de Infantil.

Moitísimos Parabéns, artistas!!! 


9/3/22

8-M Día Internacional da Muller

No Día internacional da Muller quixemos ensalzar a figura de todas as mulleres que forman parte das nosas vidas. Elaboramos un mural con debuxos representativos destas figuras: avoas, nais, tías, irmás.. A figura da "mamá" foi a máis reproducida. 

Neste momento tan convulso, debido á guerra en Ucraína, eleximos unha frase da canción Ay mamá de Rigoberta Bandini como lema.

A continuación deixámosvos unha foto de cada aula de Infantil.


Por unha sociedade máis igualitaria e xusta!!!

Por un mundo sen guerras!!!


23/2/22

DÍA DE ROSALÍA

Hoxe conmemórase  o día de Rosalía de Castro. Este ano quixemos celebralo rememorando o seu poema Alborada, velaí tedes o resultado!!

Podedes tamén escoitalo se escaneades este código Qr

 

 Amais de recitar dito poema, elaboramos unhas carautas de Rosalía, facendo deste día unha celebración moi divertida!!

Feliz día de Rosalía no seu 185 aniversario!

11/2/22

11 F: DÍA INTERNACIONAL DA MULLER E A NENA NA CIENCIA.

Con motivo da conmemoración do Día Internacional da Muller e a Nena na Ciencia, en Infantil estudamos a dúas importantes mulleres: Isabel Zendal (primeira enfermeira en misión internacional) e Felisa Martín Bravo (primeira doutora en física de España e primeira muller en ingresar no Centro Superior de Metereoloxía).


E falando de metereoloxía...realizamos un experimento: "fixemos choiva".
Deixamos documento gráfico do resultado nas seguintes fotografías.



21/12/21

A MALETA SAUDABLE NO NOSO COLE

Dentro do Programa Saúde na Escola promovido polo Concello de Barro, o alumnado de 6º de Infantil tivo a oportunidade de gozar durante dúas semanas coas lecturas e xogos que contén a Maleta Saudable que cada mes vai itinerante polos colexios da comarca (Cuntis, Barro, Campo Lameiro, Moraña e Portas). A finalidade é fomentar nas crianzas hábitos saudables de alimentación, hixiene, intelixencia emocional, autonomía e amizade.

As nosas nenas e nenos deixaron testemuña e pegada do seu traballo cunhas fermosas ilustracións no caderno que acompaña esta maleta de recursos.

19/11/21

UN VOLCÁN NO NOSO PATIO!!!

En Infantil celebramos o Día da Ciencia cun experimento moi de actualidade. Construímos un volcán e provocamos unha erupción!!!








18/6/21

Ana, Curra e Lola

Esta semana a rapazada de 3 e 4 anos tivemos unha visita moi emotiva. Viñeron vernos tres amigas: Ana, a veterinaria de Curro, e dous seres moi especiais: Curra e Lola.Curra está ceguiña e Lola recuperando a mobilidade das patas de atrás. Pero non por iso deixan de estar alegres e felices. Cremos que desfrutaron da visita tanto coma nós.
















22/5/21

XELA: FÁBRICA DE SOÑOS E PALABRAS

As nenas e nenos de 6º de Infantil desenvolveron divertidas actividades para festexar as nosas letras como a elaboración, con xices de cores, de preciosos colaxes de caracterización de Xela Arias, auténtica "fábrica de soños e palabras".

Magníficos traballos!!!


A NOSA XELA

As nosas crianzas de 3 anos conmemoraron o Día das Letras Galegas con xogos de palabras co nome de Xela e con fermosas creacións e recreacións artísticas da autora e dunha das súas obras máis coñecidas, a que leva por título Tigres como cabalos. 

Auténticas marabillas!!!






LETRAS GALEGAS XELA ARIAS

No marco da conmemoración do 17 de maio, Día das Letras Galegas, as nenas e nenos de 4 anos fixeron os seus carnés de Xela Arias e descubriron con xogos algúns dos seus libros como Tigres como cabalos e Darío a diario, obrigadas referencias na obra de Xela. Tamén debuxaron, rotularon e retrataron á nosa poeta dun xeito xenial.

Vivan as Letras Galegas!!!