SAÍDA "OS FIEITÁS"

 Os nenos e nenas de 5º e  6º de Infantil desprazáronse o mércores pasado a O Grove para gozar dunha xornada de convivencia e contacto coa natureza no campamento de "Os fieitás"

Pola mañá participaron nunha actividade de exploración e creación con elementos da natureza.

 

Despois dunha pausa para o xantar, xogaron na tirolina e gozaron coa sesión de música e baile que guiou o equipo de monitores. 

 

Finalmente baixaron á praia. Non estaba o día para un chapuzón, pero igualmente o gozaron xogando na area.

 

Unha completísima xornada!! 

 

XOGADE TAMÉN PARA INFANTIL

O alumnado de 5º e 6º de Infantil (4 e 5 anos) viaxamos o xoves a Pontevedra para participar nunha actividade de iniciación no medio acuático nas Piscinas Rías do Sur, actividade enmarcada dentro do Programa Xogade.

 

Unha actividade moi chula!

Pasámolo moi, moi ben!

SAÍDA A PONTEVEDRA

O alumnado de 4º e 5º de Infantil desprazouse a Pontevedra para participar nun obradoiro e visitar a exposición "Picasso protagonista" que promove Afundación Abanca no Café Moderno.

Pasámolo xenial!!!

VISITAMOS O PARQUE ARQUEOLÓXICO DA ARTE RUPESTRE DE CAMPOLAMEIRO

Hai uns días, as nenas e nenos de Infantil do cole desfrutamos da nosa saída de fin de curso. Visitamos o Parque Arqueolóxico de Campolameiro. 

Fixemos dous obradoiros moi interesantes, a través dos cales puidemos poñernos na pel das mulleres e dos homes da prehistoria: pintura rupestre e sementes do pasado.

Durante a nosa estancia no parque, realizamos dúas visitas guiadas: unha á exposición estable do edificio do museo; e outra, á área arqueolóxica, onde puidemos ver os petróglifos e unha recreación dun poboado da Idade de Bronce.

Na área exterior,  agardábanos unha sorpresa: un enorme labirinto!!! Pasámolo xenial tentando buscar a saída...que ten truco!

SAÍDA AO TEATRO

     O luns 17 de abril, as nenas e nenos de Educación Infantil fomos ao teatro. Vimos "Feo", unha adaptación, a cargo de Caramuxo Teatro, do conto "O parruliño feo" de Hans Christian Andersen, no Auditorio Sede Afundación de Pontevedra.

                                                Velaí as caras de felicidade que tiñamos!!!

        Despois de desfrutar da obra, achegámonos ao parque de Campolongo para merendar e...

 

Pasalo moi ben!!!

 

As nosas caras de felicidade falan por si mesmas!!!

Excursión ao Grove

O pasado venres, día 3, o alumnado de 4 e 5 anos foi de excursión ao Acuario do Grove. Desfrutou moito e mesmo tivo un ataque virtual dun tabeirón!

Comimos nun precioso parque que hai na illa da Toxa, no que viven os grobits. Pero non había ninguén nas súas casiñas. Deberon ir tamén de excursión.

SAÍDA AO TEATRO

Onte, as aulas de 4 e 5 anos acudimos ao auditorio de Afundación de ABANCA en Pontevedra. Vimos unha obra de teatro titulada  "O lobo e a lúa".

 Pasámolo xenial e desfrutamos moito cos monicreques!!

Para rematar a nosa visita a Pontevedra, fixemos unha foto de grupo...que guapiños saímos!!!

SAÍDA FIN DE CURSO AO ACUARIO

O pasado venres, as nenas e nenos de 4 e 5 anos fomos de excursión ao Acuario do Grove.

Dende o primeiro momento, a nosa atención quedou cautiva por todos os peixes e animais mariños que alí puidemos ver. Grazas ás explicacións dos nosos monitores, coñecemos moitas cousas sobre o seu hábitat.

Miramos raias, lorchos, escachos, morenas, rodaballos, cabaliños de mar, polbos... O que máis nos chamou a atención foi ver ovos e crías de tiburón! E deixáronnos tocar os ourizos e as estrelas de mar!

Durante a visita, vimos un esqueleto de balea que apareceu varada na praia. Cando lle fixeron a necrose, atoparon a súa barriga chea de plástico; morrera pola irresponsabilidade das persoas. Foi unha gran lección!

Logo de alimentar o noso a saber, fomos alimentar os estómagos coas nosas merendas nun fermoso piñeiral.

Pasámolo en grande!!

SAÍDA A PONTEVEDRA

O pasado 23 de Abril, o alumnado de 5º e 6º de Infantil desprazouse a Pontevedra para gozar coa magnífica representación da compañía Periferia Teatro: "Guyi Guyi". Unha adptación libre para títeres do clásico conto  "O parrulo feo".

Coa mañá de choiva que apareceu, o alumnado tivo que facer a súa merenda no vestíbulo do auditorio.

A continuación, desprazáronse ao Café Moderno onde gozaron cunha exposición sobre o loro Rabachol e un obradoiro no que recrearon unha máscara.

Unha mañá moi proveitosa!!!

IMOS AO TEATRO!!!

O pasado luns 4, os nenos e as nenas de 4 e 5 anos fomos ver un teatro musical chamado Burbujas de papel.

Gustounos moito!!!

PETRÓGLIFOS

Nestas últimas semanas de clase tivemos unha compañeira de viaxe moi especial....Petra!, unha nena da Idade de Bronce que viaxou no tempo para abrirnos as portas dunha etapa moi importante no desenvolvemento da nosa historia.

O proxecto arrancou dende a biblioteca do Centro cun xogo de pistas que nos levou a coñecer a Petra e iniciar o noso Proxecto de Petróglifos.

Pintamos fermosos murais con distintas técnicas e planos...

Na nosa investigación, sentimos curiosidade polos traballos coa palla, a profe Amelia ensinounos como se trenza a palla...

Nesta pequena  ventá ao pasado que abrimos tivo moito protagonismo tanto o presente coma o  futuro máis inmediato da nosa sociedade: as novas tecnoloxías. Dende o inicio xogando co robot Mbot que nos guiou nas pistas da biblioteca ata o final co achegamento da moita información do noso Concello sobre os petróglifos con códigos Qr.

 

VISITA Á BIBLIOTECA PÚBLICA DE CALDAS DE REIS

O pasado 8 de xuño, as nenas e nenos de tres anos do noso Centro visitamos a Biblioteca pública "Padre Martín Ferro" de Caldas de Reis. Rosa e Cristina, as responsables da biblioteca, ensináronnos que hai moitos libros diferentes: grandes, moi grandes, pequenos, moi pequenos, libros acordeón, con lapelas, con sorpresa, ... Contáronnos unha manchea de contos moi divertidos!!! Para rematar a visita na biblioteca, puidemos coller e ver os libros que quixemos da zona infantil!! Foi xenial e gozamos moitísimo!!!

Antes de voltar ao cole, merendamos no Xardín. Aquí podedes ver un vídeo resumo da xornada.

Grazas Rosa e Cristina por amosarnos a biblioteca, por facernos pasar unha mañá marabillosa entre  risos, sorpresas e fantasía, grazas por abrirnos, un pouquiño máis,  as portas do mundo máxico dos contos e dos libros!!

SAÍDA Á EEI A GALIÑA AZUL DE 4º EDUCACIÓN INFANTIL

O pasado 15 de maio as aulas de 3 anos fomos cantar unha canción aos nenos e nenas da EEI A Galiña Azul de Barro.  Foi a nosa aportación aos Contacontos Interciclos que o noso centro programou no marco das actividades "Do Libro ás Letras" para a semana grande das Letras Galegas.

Despois, o profesorado da Escola Infantil contounos o conto "Unha eiruga moi larpeira". Para rematar pintamos unha bolboreta!!

Pasámolo moi ben!! 

Moitas grazas ao equipo docente da EEI A Galiña Azul de Barro pola súa colaboración.

SAÍDA Á EEI A GALIÑA AZUL DE 6º DE INFANTIL

O 16 de maio as aulas de cinco anos fomos contar un conto aos nenos e nenas da EEI A Galiña Azul de Barro. Foi a nosa aportación aos Contacontos Interciclos que o noso centro programou no marco das actividades "Do Libro ás Letras" para a semana grande das Letras Galegas.

A aula de 5 anos A contou e representou o conto "Imos cazar un oso" de Michael Rosen.

A aula de 5 anos B contou "Tres lobos e un Pirata" un conto de produción propia.

As profes da Escola tiñan preparada unha bonita sorpresa! Participamos como actores e actrices na representación do conto "Os tres porquiños".
Foi xenial!!!

Queremos agradecer ao equipo docente da EEI A Galiña Azul de Barro a súa colaboración.

TEATRO: "ANTÓN COMODÓN"

O mércores 9 de maio as aulas de 5º e 6º de Educación Infantil do noso centro acudiron a ver a obra de teatro de títeres "Antón Comodón" de L'Estaquirot Teatre con música orixinal de Ferran Martínez no auditorio sede Afundación de Pontevedra.

Antón era un adulto que non sabía facer nada só: nin vestirse, nin comer, nin atarse os zapatos... Tiña un axudante, Nicolás, que lle facía todo. Pero un día, Nicolás decidiu marchar ás Illas Verdes...

Agora a pensar e repensar que podemos facer para non ser como Antón Comodón!!

Visita ao Salón do Libro 2018

Fixemos unha saída moi interesante e divertida ao Salón do Libro de Pontevedra. Nada máis chegar, agardábanos alguén moi especial...Orbil !!!

Despois pasamos a unha sala onde nos esperaba unha contacontos mexicana. Este ano o país invitado é México. A sala estaba ambientada con motivos da cultura mexicana. Quedamos marabillados! Quedamos marabilladas!

Tras escoitar os contos, fixemos unha visita pola exposición dos traballos de todos os coles participantes. Alí tamén estaba o noso.

Antes de rematar, Rocío, a nosa monitora, falounos sobre México. Despois probamos un fermoso recuncho de lectura onde podemos ir coa familia a desfrutar dos libros.

Para rematar a mañá, fomos ao Edificio VI do Museo de Pontevedra. Alí nos falaron dos Romanos e puidemos ver unha exposición da Prehistoria recreada con "playmobil" que leva por título "Playevolución".   

Agardamos que vos guste o resumo desta mañá tan completa.

Podedes entrar no blog da biblioteca para saber máis do traballo que presentamos desde o noso cole. 

https://oblogdemimi.blogspot.com.es/2018/04/participamos-no-xix-salon-do-libro-de.html

Visita a Clesa catro e cinco anos

O pasado 1 de decembro visitamos a fábrica Clesa en Caldas de Reis. Os nosos anfitrións foron os integrantes de Polo Correo do Vento, grandes profesionais que nos achegaron dun xeito moi lúdico o traballo diario desta fábrica.

 

Fixemos un pequeno obradoiro de debuxo e seguindo paso a paso as instruccións... debuxamos unha fermosa vaca!

Para rematar tomamos unha rica merenda, cortesía de Clesa. 

Queremos agradecer a amabilidade e o bo facer destes dous profesionais, así memo, dar as gracias a Clesa por abrir as súas portas  aos centros escolares que desexen visitar a fábrica, pola rica merenda e polo detalle que tivo con cada neno e cada profesora.